見過鬼唔怕黑　熱刺想簽利萊辛尼

熱刺今季成績低落，陣中唔少球星都表現唔出水準，德國翼鋒迪姆華拿早前就被領隊普斯迪高路狠批，不過佢哋見過鬼睇唔怕黑，據報有意收購另一受到質疑嘅德國翼鋒利萊辛尼。

據德國《圖片報》報道，利萊辛尼同拜仁慕尼黑合約季尾完結，而且續約未有聲氣，1月份可能會被提前賣走，熱刺就希望用低價簽入呢位28歲前曼城翼鋒，但可能面臨曼聯嘅競爭。

傳聞爆出後，唔少熱刺球迷都表示反對，尤其佢哋向RB萊比錫借用嘅迪姆華拿，早前先被普斯迪高路公開炮轟「Hea踢」，而利萊辛尼同樣經常被質疑效率差勁，熱刺貪平買人隨時自討苦吃。