夏蘭特宴客做罪人　曼城被拖肥逼和再失分

周四（26日）晚「拆禮物日」英超頭場，衞冕嘅曼城低處未算低，射手艾寧夏蘭特成場隱形之餘，仲射失12碼，最終畀「拖肥」愛華頓逼和1比1，連續4場聯賽失分，夏蘭特呢次孭晒鑊。

之前各項賽事近12場僅1勝嘅曼城，主帥哥迪奧拿為止跌勢，今仗改用4141陣式，用貝拿度施華、菲爾科頓、沙雲奴同謝利美杜古，支援箭頭艾寧夏蘭特，一開波即狂攻愛華頓，先有「帶刀侍衞」加華度爾頭槌頂中柱，14分鐘貝拿度施華窄位施射，省中人改變方向破網。雖然曼城之後都控制戰局，但36分鐘一時走漏遠柱嘅伊利文尼戴耶，畀佢射入靚波扳平。

易邊後曼城繼續施壓，初段有沙雲奴殺入禁區被撞跌，球證直指12碼，可惜艾寧夏蘭特操刀，畀「拖肥」門將比克福特捉到路救出，之後佢再頭槌補中，卻越位在先食詐胡，近8場聯賽入得1粒，真係黑氣未除，最終各一言和，哥帥抓爆頭都冇計。